(1)
النهارده الخميس....عيد ميلاد ابليس و زي متعودنا انا وحسين وقفنا عند كشك عم انور الي علي ناصيه شارعنا في "نصر الدين" نشرب سجارتين الحشيش الي لفناهم في السيبر ونتفرج علي حريم شارع الهرم يوم الخميس بالليل.
حسين ولع اول جوينت وخد منه نفس عداله.
-"صباحو ابيض يا ابو الادهيم...تسلم ايد امك..الواحد مش عارف كان من غيرك هيعيش ازاي"
-"عد الجمايل بقا يا روح امك.وروح هاتلنا ازازتين بيبسي وشكلاطين عشان نعلي الدماغ"
-"انت تؤمر يا كبير..دنتا الكينج النهارده"
خدت الجوينت من حسين وقعدت اسحب منه وانفخ الدخان واعمل منه دواير بيضه في الهوا،وفي وسط منا متكيف عدا اودامي شيخ وسمعتو وهو بيقول بصوت واطي "اعوذ بالله حشيش".
اساسا ده شيخ ابن كلب وهو عرف منين انو حشيش؟!
الشيخ وقف يشتري حاجه من الكشك لما سمع صوت حسين العالي وهو بيقول في نص الشارع
"اوب باا...النهارده الخميس ...العب..مش هنتجوز بقا يا ابو الادهيم "
حته بت انما ايه فرسه عدت اودامنا وكانت بصه في الارض وعامله خاضره الشريفه بس علي مين دا النهارده الخميس...الشيخ بص علي البت لما سمع صوت حسين العالي بس عمل نفسه بيغض بصره وشال عينه بسرعه..،بس فجأه واد ابن كلب غشيم راكب عربيه هوندا مظبطها وكان بياخد غرزه من اليمين ولقا البت في وشه وملحقش يفرمل وداسها والناس اتلمت وضيعو الدماغ علينا الله يولع فيهم.
(2)
النهارده الخميس..موسم كل اسبوع لازم اكون عامل حسابي وجايب كميه كراتين السجاير اللازمه عشان كولو بيشرب انهارده.
اهو حسين وادهم جم اهو زي كل خميس عشان يشربو ...بيعملو مشاكل كتير العيال دي .، بس والله غلابه اتخرجو بقالهم سنتين ومش لاقيين شغل لحد دلوقتي هيعملو ايه يعني؟.
يادي اليوم الي مش فايت ده محمد جيه...محمد ده ساكن في الشارع الي ورا كان زي ادهم وحسين من سنه كده تقريبا بس ربنا تاب عليه وبقا شيخ ومن يوميها كل شويه واجع دماغي بيقولي ابطل ابيع سجاير عشان حرام ..مجنون ده ولا ايه دا السجاير هيه الي فاتحه بيتي وبعدين ده اسمو كشك سجاير يعني لو بطلنا سجاير هنسميه ايه.؟؟ كشك الشيبسي الي طول النهار يشتريه ده!!
-"سلامو عليكو.."
-"وعليكوم السلام يا مولانا ..اؤمر "
-"الامر لله ..هاخد اربعه شيبسي يت عم انور..اتفضل 4 جنيه اهم"
مديت ايدي اخد الفلوس قام سحب ايدو وقالي
-"مش هتبطل تبيع سجاير يا راجل يا طيب؟"
-"يا مولانا ..انا عمري محطيتها في بؤي..انا بخاف ربنا وبخاف علي صحتي..ومقدرش مبيعاش دي هيه الي مشيه الكشك وكولو رزق من الله.."
كان هيقعد يديني محاضره في الدين بس الواد حسين زعق بصوت عالي لما شاف بت ملفوفه معديه من قدامه و قعد يزوم عليها بصوت عالي قام الشيخ محمد بص غصب عنع للبت بس غض بصره بسرعه ورجع يكلمني...بس ربنا انقذني من محاضرته والبت دهستها عربيه ولما الشيخ محمد شافها اتنفض وبسرعه راح يلقنها الشهاده.
(3)
النهارده الخميس...واليوم ده انا وهبتو لربنا لأن اليوم ده هوا الي اتقلبت فيه بالعربيه انا وحسام وحازم واحمد ..التلاته ماتو وانا الي عشت....
اكيد لو مكنش في حاجه المفروض اعملها في حياتي تاني مكنتش عشت ..ويوم الخميس هوا اليوم الي قررت اعمل فيه الجاحه دي
كل خميس من بعد العشا لحد الساعه 12 بليل اخد واحد صاحبي معايا ونتمشي علي شارع الهرم واي حد كان بيعمل زي مكنت بعمل بيشرب حشيش بيشقط بنات بيرفع ميه وبرشام بقعد اتكلم معاه .
والحمد لله في ناس بتتأثر بكلامي .
والنهارده وانا راجع قولت اعدي علي عم انور اسلم عليه واشتري منه اي حاجه واقوله يبطل يبيع سجاير،انا قولتله قبل كده ولسه برده بيبيع بس هفضل وراه لحد ميبطل يبيع اصل عم نور ده راجل زي العسل وبحبه لله في لله.
ادام الكشك كان واقف شاب وقاعد بينفخ دخان سجاره الحشيش عديت من جمبه وانا بستعيذ بالله من الحشيش وسنينه وقولت هكلم عم انور وبعدين اكلمه هوا كمان منا كنت زيه بقف نفس الوقفه وانفخ نفس الدخان .
وفي وسط منا بكلم عم نور سمعت واحد بيقول "اوباا" افتكرت فيه حاجه... وبصيت اشوف فيه ايه ليقيته بيعاكس واحده فغضيت بصري وقولت اقول لعم نور حديث المال الحرام وبعدين اشوف الي بيعاكس ده...بس ملحقتش.
سمعت صرخه كوتشات عربيه فبصيت لقيت واحد خبط البنت...فاتنفضت من مكاني وافتكرت صحابي الي ماتو لما لقيت البنت سايحه في دمها وخلاص بتموت رحت من غير محس بسرعه القنها الشهاده الي ملقنتهاش لصحابي وسبحان الله البنت قالتها وماتت.
اسلام البدري
